ქუჩაში რომ შეგხვდეთ

პოსტის ავტორი

ტეგ თამაშები ყოველთვის მომწონდა, რამდენიმე ასეთი მეც გამიკეთებია და ვთვლი რომ სახალისო გასართობია ბლოგოსფეროსთვის. თან ბევრ ისეთ ინფორმაციას გაძლევს ამა თუ იმ ბლოგერის შესახებ, რომელასაც სხვაგვარად ვერ გაიგებდით. მაგალითად ამ თამაშის მთავარი პრინციპი არის ის, რომ მოვყვეთ თუ დღის განმავლობაში სად ვატარებთ დროს, სად შეიძლება შეგვხვდეთ ქუჩაში და რა ვიზუალური მახასიათებლებით გვიცნობთ. შემდეგ კი ალავერდის პრინციპით სხვა ბლოგერი მოგვიყვება საკუთარ თავზე. მოკლედ ასე და ამგვარად ლევოს მიერ დათაგული ანუ ალავერდგადმოცემული თუ როგორც არის, ვეცდები მცირე დეტალები მოგიყვეთ ჩემი ყოველდღიურობიდან.

სად

ყველაზე ხშირად ჩემი ნახვა ალბათ ისევ ინტერნეტ სივრცეშია შესაძლებელი ამ მისამართზე. 24/7 ზე თუ ვერა 10/7 ზე მინიმუმ აქ დაგხვდებით. განსაკუთრებით თუ ღამით უძილობამ შეგაწუხათ და თუნდაც 5 საათისთვის სხვა მოსაუბრე ვერავინ გამონახეთ, შეგიძლიათ მომაკითხოთ ოღონდ ფერმის მორწყვას და ასეთებს ნუ მომთხოვთ, ქრონიკულად ვერ ვიტან აგრონომებს, მითუმეტეს ვირტუალურ აგრონომებს .

მეორე ადგილი სადაც დღის განმავლობაში გარკვეულ დროს ვატარებ, ილიას უნივერსიტეტია A, D და E კორპუსები. შუალედების დროს რომელიც ძირითადად 4 ხშირ შემთხვევაში 5 საათიან მონაკვეთებსაც კი მოიცავს, ან ილიას უნივერსიტეტის ლიტერატურულ კაფე ლიგამუსში ვზივარ დარბაზში და წიგნს ვკითხულობ, მინიმუმ ვათვალიერებ ან ვეძებ რაიმე ჩემთვის საინტერესოს, ან აბაშიძეზე მდებრე კაფეში რომელსაც თუ არ ვცდები donate story ჰქვია.

რითი

ძირითადი ჩემი სატრანსპორტო საშუალება, რომლითაც ვმოძრაობ საკუთარი ორი ფეხია. ყველაზე იაფი და ეკოლოგიურად სუფთა. ჩვევა მაქვს ასეთი . როცა დრო არ ითმენს, ამ შემთხვევისთვის 9 ნომერი ავტობუსი მეგულება ვაგზლის მოედანზე, ან სულაც 36 კოლმეურნეობაზე სახლისკენ მიმავალს. ტაქსებში ფულს აღარ ვყრი რამდენიმეჯერ არაადეკვატურ მდგომარეობაში მყოფი ტაქსისტი შემხვდა და არ მსურს საკუთარი სიცოცხლე ვიღაცის ვენაში გაჩხერილ ნარკოტიკს შევეწირო. ასეთებიც არიან ხანდახან თბილისურ ტაქსებში, ყველაში არა რა თქმა უნდა. უკეთეს შემთხვევაში ზედმეტი საუბრით მაწუხებენ .

როგორ

არ გაგიკვირდეთ, რომ თუნდაც თმადაუვარცხნელი შეგხვდეთ ქუჩაში. ეს იმის ბრალია რომ სახლიდან გამოსვლამდე 5 წუთით ადრე გავიღვიძე, მერე და რა მნიშვნელობა აქვს იმას, რომ თუნდაც დღის 2 საათი იყოს. ამჯერად და ალბათ უმეტესწილად მოკლეზე შეჭრილი თმა მაქვს . აი იმ დანარჩენი დროის განმავლობაში კი უაზროდ გაბურძგნული დავდივარ . მაცვია ძირითადად ის რაც დილით მომხვდება ხელთ, არ ვაქცევ ასეთ დეტალებს ყურადღებას.

რას

ძირითადად ვსვავ: red bull-ს , XL-ს, ან B52- ს , მოკლედ ყოველგვარ ენერგეტიკულ სასმელს უზომო რაოდენობით, რაც ძირითადად შემდგომში ჩემი უძილობის განმაპირობებელი მიზეზი ხდება ხოლმე, ამიტომ უკვე დღეიდან ძილის წინ დრიმოლინს, წამალია ასეთი საძილე საშუალება .

ვისთან ერთად

უკომენტაროდ